منگلورو،22؍جون (ایس او نیوز) کودرولی قصائی خانے سے کنکن ناڈی مارکیٹ میں پرمٹ کے ساتھ گوشت لے جانے والے ٹیمپو پر کل جو حملہ کیا گیا تھا اس ضمن میں پولیس نے آج 5ملزمین کو گرفتار کرلیا ہے۔

یاد رہے کہ کل صبح کے وقت ہائی لینڈ ہاسپٹل سے قریب گوشت لے جارہے ٹیمپو پر ایک گینگ نے حملہ کیا تھا اورراشد نامی ڈرائیور کی پیٹائی کے علاوہ ٹیمپو کو نقصان پہنچنے اور 200کلو گرام بیف پر کیروسین انڈیل کر اسے ناقابل استعمال کردیا تھا۔جس کی شکایت پولیس میں درج کروائی گئی تھی۔

 اب اس معاملے میں کدری پولیس نے جن پانچ ملزمین کو گرفتار کیا گیا ہے ان کی شناخت دکشیت کمار (19سال)،راجو پجاری (19سال)، سنتوش کمار (31سال)، بالاچندرا (28سال) اور رکشیت (22سال) کے طور پر کی گئی ہے جو منگلورو کے مختلف علاقوں کے رہنے والے ہیں۔